A XUNTA FINANCIARÁ CON CASE 800.000 EUROS OS CURSOS DUAIS DE FORMACIÓN PARA PERSOAS DESEMPREGADAS EN VIGO
A delegada territorial de Xunta en Vigo destaca o compromiso do Goberno galego por incrementar as oportunidades e a estabilidade laboral das persoas sen emprego a través de obradoiros duais
Ana Ortiz clausurou este venres o II Obradoiro Montes de Vigo e avanzou unha terceira edición, ademais de renovar o curso Vigo Capacita cunha achega de 531.000 euros ao Concello de Vigo
No caso de todos os concellos da área territorial, a nova convocatoria adica máis de 5 millóns para que un total 190 persoas sen emprego melloren a súa cualificación e accedan a un traballo
A delegada territorial da Xunta de Galicia en Vigo, Ana Ortiz, confirmou que o Goberno galego financiará con 796.569,30 euros os talleres duais de emprego no municipio vigués. Así o avanzou a representante autonómica durante a clausura do II Obradorio Forestal Montes de Vigo que se levou a cabo este venres no parque Maruxento de Matamá.
Ortiz confirmou unha achega de 531.046,20 euros para o curso Vigo Capacita IX, concedidos a través do Concello de Vigo, e outros 265.523,10 euros para o III Obradoiro Forestal Montes de Vigo, a través da Mancomunidade de Montes. A financiación permitirá que 30 personas sen emprego melloren a súa cualificación ao tempo que acceden a un traballo.
Neste sentido, a delegada territorial tamén detallou que a nova convocatoria deste programa mixto de formación e emprego dirixida á realización de obradoiros, permitirá chegar no caso de todos os municipios da área viguesa a un total de 190 persoas desempregadas cunha financiación de 5,04 millóns de euros.
Compromiso da Xunta
A representante autonómica enfatizou o compromiso do Executivo galego por incrementar as oportunidades e a estabilidade laboral dos galegos e galegas, cunha formación adaptada ás demandas reais do mercado e en colaboración cos concellos. Fixo así especial fincapé na ampla dimensión destes programas, por canto melloran a empregabilidade dos participantes ofrecéndolles unha formación para o emprego teórica e práctica de calidade, con opción a obter un certificado de profesionalidade e a un contrato de traballo.
Ana Ortiz subliñou que as actuacións propostas contribúen a mellorar os espazos públicos e a ofrecer servizos de interese xeral e social, incrementando o emprego nos concellos. Estes obradoiros, que está previsto se poñan en marcha antes de finalizar o ano, ofrecen formación e emprego a 190 persoas, que contarán cun contrato de traballo durante a súa participación na actividade e, ao finalizar a etapa formativa, acreditarán as ensinanzas recibidas cun certificado de profesionalidade.
