O Presidente do PPdeG asegurou que conta con todos para seguir sendo unha excepción de estabilidade, responsabilidade, unidade e sentidiño
RUEDA DEMANDA SER ESIXENTES PORQUE SERÁ O CAMIÑO PARA GARANTIR A NORMALIDADE EXCEPCIONAL EN GALICIA
Amosouse convencido de que os mellores tempos para Galicia aínda non foron chegados
Afirmou que as solucións aos problemas de Galicia non son máis socialismo, máis nacionalismo ou máis populismo, senón máis Galicia, máis España e máis Europa
O presidente do Partido Popular de Galicia, Alfonso Rueda, animou hoxe a todos os galegos a ser esixentes porque “a esixencia será o único camiño para garantir a normalidade excepcional da que fai bandeira a Comunidade galega”, para o que asegurou que conta con todos para seguir sendo unha excepción de estabilidade, de responsabilidade, de unidade e de sentidiño.
Alfonso Rueda asegurou que o mellor referente para Galicia é a propia Galicia, pero recoñeceu que esta comunidade aínda non é perfecta, polo que anunciou que “seguiremos buscando vías para mellorar”. Neste sentido, afirmou estar convencido de que os mellores tempos para Galicia aínda non foron chegados, porque, segundo dixo, pode reforzar o seu liderado na industria téxtil, conserveira, na automoción ou no sector forestal; brillar cada vez máis en sectores emerxentes, como o aeroespacial, o biotecnolóxico ou o das TIC; avanzar na mellora do seu sistema sanitario público; ser un referente nacional en políticas de conciliación; ou atraer a moitos máis turistas.
GALICIA, O CAMIÑO A SEGUIR
Neste sentido, o presidente do PPdeG manifestou que o seu camiño a seguir chámase Galicia e culmina en tres metas: traballo, familia e futuro. Así, concretou que o seu traballo non estará completo mentres haxa un só galego que queira traballar e non poida; a súa familia será a mellor inspiración para facer cada día de Galicia o mellor lugar para formar un fogar; e os seus obxectivos estarán cumpridos se, ao remate do seu mandato, pode dicir que deixa unha comunidade mellor para os galegos do futuro.
Rueda tivo unha mención específica para a xuventude, na que asegurou que son libres aínda que non son tempos fáciles para a xente nova. Por este motivo, sinalou que o PPdeG seguirá traballando para que a xente nova teña cada vez máis e mellores oportunidades, porque con compromiso, con enerxía e con talento están a demostrar cada día que as merecen.
Na súa intervención, Alfonso Rueda amosouse “inmensamente honrado da confianza que depositastes en min para presidir o PPdeG”. Neste sentido, afirmou asumir a Presidencia do mellor partido de Galicia, cuxa traxectoria se entrelaza e se confunde coa do pobo galego.
RESPALDO DE AFILIADOS E MILITANTES
Recoñeceu que accede á Presidencia do PPdeG porque conta co respaldo dos afiliados e militantes desta formación; porque o Partido Popular de Galicia pode seguir sendo o mellor acompañante do pobo galego; e porque Galicia, agora máis que nunca, necesita o que só o PPdeG pode ofrecerlle. Deste xeito, indicou que as solucións aos problemas de Galicia non son máis socialismo, máis nacionalismo ou máis populismo, senón máis Galicia, máis España e máis Europa, con naturalidade, con normalidade e sen incompatibilidades.
Alfonso Rueda tivo palabras de agradecemento ao presidente do Partido Popular, Alberto Núñez Feijóo, de quen dixo que foi “o mellor mestre, o mellor referente e o mellor Presidente”. Neste punto, asegurou que Galicia non lle vai fallar e amosouse convencido de que Feijóo xamais fallará a Galicia, ao tempo que apuntou que continuar o seu traballo nesta Comunidade autónoma é unha inmensa responsabilidade e un orgullo. “Comprométome a dar o máximo de min para estar á altura do PPdeG de onte, do de hoxe e do de mañá”, sinalou.
De cara ás vindeiras eleccións municipais, o presidente do PPdeG avogou por construír un proxecto para Galicia, que é una pero tamén 313. Para iso, dixo que o Partido Popular de Galicia xógase contar con equipos que estean en plena forma para gañar despois as eleccións xerais e as autonómicas, polo que demandou seguir sendo un partido xenuinamente popular, o que significa estar en cada barrio, en cada aldea, en cada rúa e en cada praza.
