FERNÁNDEZ-TAPIAS DESTACA O FOMENTO DA SOLIDARIEDADE NA NOVA EDICIÓN DA XACOBEO WILD RACE NOS MONTES DE VIGO

A delegada territorial da Xunta presentou a carreira de obstáculos que se celebrará o vindeiro 3 de xullo e que xa conta con 200 inscritos

A delegada territorial da Xunta en Vigo, Marta Fernández-Tapias, presentou este sábado unha nova edición da Xacobeo Wild Race, a carreira de obstáculos que se celebrará o vindeiro 3 de xullo no parque forestal de San Miguel de Oia. A proba, segundo desvelaron os organizadores, conta xa con 200 inscritos.

“O evento pon en valor unha das rutas en auxe do Camiño de Santiago como é o Camiño Portugués da Costa, polo que é unha competición que está intimamente vencellada á ruta xacobea e aos valores que a diario levan a milleiros de peregrinos a percorrela”, apuntou. Fernández-Tapias estivo acompañada polos representantes da organización, Óscar Gallego e Miriam Gesteiro, así como polo presidente da AAVV San Miguel de Oia, Ángel Goberna, e o presidente da Comunidad de Montes de San Miguel, Manuel Giráldez.

O Xacobeo Wild Race adaptará o percorrido dos 10 quilómetros planificando aqueles que supoñan unha sorpresa e un auténtico reto para os atletas, co selo diferenciador da inclusión de 40 probas e obstáculos adaptados de outras disciplinas coma o CrossTraining, Strongman, Escalada-Bulder, Parkour ou Paleotraining, facendo así a competición máis completa e espectacular.

“A Wild Race fomenta a solidariedade e a sustentabilidade cultural, social e medioambiental, cun énfases especial na igualdade de xénero a través da formación de equipos femininos e potenciando o traballo en equipo das atletas”, engadiu a delegada.

Fernández-Tapias exemplificou nesta proposta a filosofía coa que o Executivo autonómico está a celebrar este dobre Ano Santo, cunha oferta única e diferenciada, na que teñan cabida iniciativas de toda índole, co obxectivo de chegar a todos os galegos e a cada un dos recunchos de Galicia. Neste senso, a representante autonómica insistiu en que a Xunta deseñou o mellor Xacobeo de todos os que se recordan, cunha potente programación na que Vigo xoga un papel fundamental ao longo deste 2022 con todo tipo de actividades e eventos destacados.