A CIDADE DE VIGO PREPÁRASE PARA A SEGUNDA EDICIÓN DO GALICIA FEST QUE CO APOIO DA XUNTA PROMETE MELLORAR A AFLUENCIA DE 2025

“A cidade de Vigo converterase de novo nun dos epicentros musicais do verán coa celebración da segunda edición do Galicia Fest, que terá lugar os días 26 e 27 de xuño no Peirao de Transatlánticos”. Así o puxo de manifesto o director de Turismo de Galicia, Xosé Merelles, no decurso do acto de presentación da cita musical no que tamén participou a delegada territorial da Xunta en Vigo, Ana Ortiz.

Durante a presentación da cita, tanto o director de Turismo de Galicia coma a delegada territorial coincidiron en sinalar “os acertos deste festival apostando pola música indie-pop de enorme actualidade, nun formato medio pero suficientemente atractivo, e nunha contorna urbana”. “Son características que unidas ao éxito da primeira edición nos fan pensar nunha maior asistencia este 2026”, destacou Xosé Merelles.

O director de Turismo de Galicia referiuse á ampla e diversa oferta desta segunda edición destacando o éxito e a repercusión das bandas e artistas que o integran. Así, encabezada este plantel o fenómeno internacional La Reina del Flow, ao que se suman artistas como Maryland, Miriam Rodríguez, Pablo Lesuit, Sabela, Álvaro de Luna, Juan Magán, Taburete, Carla Lourdes, Fredi Leis e Marlena. Ademais, Xosé Merelles valorou especialmente que se sumaran as novas incorporacións de Lori Meyers, Coti e Vera Fauna, “que completan así unha oferta musical atractiva e plural”.

Tras o éxito da súa primeira edición en 2025, que reuniu a máis de 13.000 persoas, o Galicia Fest regresa adiantando as súas datas a comezos do verán, e reforzando a capacidade para atraer público e dinamizar a actividade turística en Vigo. Ademais, segundo subliñou o director de Turismo de Galicia, “actúa como motor socioeconómico para a cidade, xerando impacto económico e promovendo a riqueza, ao tempo que atrae visitantes de diferentes puntos de España interesados nunha proposta musical urbana, actual e de calidade”.

O evento enmárcase no programa Concertos do Xacobeo, unha iniciativa da Xunta de Galicia que aposta por situar a comunidade como un destino de referencia para a música en directo, segundo salientou o director de Turismo de Galicia.

Neste senso, Xosé Merelles lembrou que no conxunto de 2025, “máis de 1,5 millóns de persoas asistiron aos máis de 180 eventos musicais celebrados en preto de 80 localidades galegas baixo o paraugas desta iniciativa”. “Desde a súa posta en marcha, os Concertos do Xacobeo acumulan xa arredor de 4 millóns de asistentes”, afirmou.

Finalmente, segundo o director de Turismo de Galicia, os Concertos do Xacobeo teñen demostrado o seu carácter desestacionalizador ao contabilizar o pasado ano preto do 48% dos concertos fóra dos meses de xullo e agosto, favorecendo a chegada de visitantes ao longo de todo o ano.