Luisa Sánchez participa na recepción oficial á La Solitaire du Figaro Paprec en Vigo

A vicepresidenta da Deputación de Pontevedra e deputada de Deportes, Luisa Sánchez, participou na recepción oficial á regata La Solitaire du Figaro Paprec celebrada en Vigo, coincidindo coa chegada desta prestixiosa competición ao porto olívico. Tras finalizar este xoves a primeira etapa con 41 embarcacións en liza, a proba fai escala ata o domingo en Vigo como única parada en España desta 57ª edición.

Luisa Sánchez remarcou a importancia de que Vigo e a provincia de Pontevedra acollan eventos deportivos internacionais “que sitúan o noso territorio no mapa mundial da vela e contribúen á dinamización económica e turística”. A escala da regata reúne durante catro días a regatistas, equipos técnicos e afeccionados e propicia un amplo programa de actividades abertas ao público no peirao de Portocultura. A vicepresidenta participará este sábado pola mañá na cerimonia de entrega de trofeos.